ശാസ്ത്രം, സത്യം

അതിരുകളില്ലാത്തൊരാകാശം..
അനന്തനീലാകാശം
എണ്ണിയാല്‍‍ തീരാത്ത
നക്ഷത്രക്കണ്‍ചിമ്മി
നമ്മെ വിളിക്കുന്നു
കാതോര്ക്കുവിന്‍..
നിത്യം വികസിക്കു
മത്ഭുത പ്രകൃതി
യോടൊപ്പം വളരുവിന്‍
കൂട്ടുകാരേ…
കൌതുകക്കണ്‍കളാല്‍
സത്യസൌന്ദര്യങ്ങ-
ളൊന്നിച്ചു നുകരുവിന്‍
കൂട്ടുകാരേ..
ആയിരം വര്ണങ്ങളാ
യിരം നാദങ്ങളാ
യിരം രാഗതാളങ്ങള്‍….
പുലരിയായ്
പൂക്കളായ്
പുഴകളാ,യലകളായ്
നിത്യം വിടരുന്നതെന്തു കൊണ്ട്
അത്ഭുതം കൂറുന്ന
കണ്‍കളിലെന്നെന്നും
സൂര്യനായി ചോദ്യം
ജ്വലിച്ചിടട്ടെ!
വളരേണമിച്ചോദ്യം.
ചോദ്യം
നിലയ്ക്കാത്ത ചോദ്യം
അതില്‍ നിന്നു പട വെട്ടി
വിരിയുന്ന ശരി വഴികള്‍..
അത് മര്ത്യവിമോചന മാര്ഗം
അതിനുള്ള പേരാണ് ശാസ്ത്രം..
അത് തന്നെ സത്യം..